भारतीय प्रधानमन्त्री नरेन्द्र मोदी पाँचौ पटक नेपाल भ्रमणमा आउंदै


  • Frontline Nepal

कात्तिक १८,काठमाडौँ । भारतीय प्रधानमन्त्री नरेन्द्र मोदी मंसिर २६ गते नेपाल आउने भएका छन्। विवाह पञ्चमीको अवसर पारेर जनकपुर आउन लागेका मोदी प्रधानमन्त्री भएपछिको पाँचौ नेपाल भ्रमण हुनेछ।

उनी यसपटक धार्मिकसँगै रेलमार्ग र विराटनगरको एकीकृत जाँच विन्दु(आइसिपी)को उद्घाटन गर्न नेपाल आउन लागेका हुन्। यी दुबै परियोजनाको प्रधानमन्त्री केपी शर्मा ओली र मोदीले संयुक्त रुपमा उद्घाटन गर्नेछन्।

उनी प्रधानमन्त्री भएपछि पहिलो पटक २०७१ वैशाखमा नेपाल भ्रमणमा आएका थिए। विराटनगर महानगरपालिका वडा नं १८ भेडियारी र त्यसको समानान्तर भारतीय भूमिमा बनेको एकीकृत जाँच विन्दु (आइसिपी)को उद्घाटन मंसिर २६ गते हुने भएको छ । ओली र मोदीले ३८ किलोमिटर लामो जनकपुर–जयनगर रेल खण्डको पनि उद्घाटन गर्ने कार्यक्रम छ।

कार्यक्रमअनुसार जनकपुर–जयनगर रेल खण्डको उद्घाटन गरेपछि आइसिपीको उद्घाटन गर्ने कार्यक्रम छ। यसपछि आइसिपी खण्डमा पनि रेल सञ्चालन गरिने छ। पूर्वको व्यावसायिक समृद्धिका लागि ड्रिम प्रोजेक्ट मानिएको विराटनगर र सीमावर्ती भारतको गरी दुबै स्थानका आइसिपी भारु ३७३ करोडको लागतमा तयार भएको निर्माण कम्पनीले जनाएको छ।

प्रतिक्रिया
सम्बन्धित समाचार
ताजा अपडेट