काठमाडौं । हेल्प नेपाल नेटवर्क (Help Nepal Network) संसारभर छरिएर रहेका नेपालीहरूलाई परोपकारी भावना र सामाजिक उत्तरदायित्वको एउटै सूत्रमा जोड्दै नेपालका दुर्गम तथा पिछडिएका समुदायका लागि शिक्षा, स्वास्थ्य, महिला तथा बालबालिका संरक्षण र प्राकृतिक विपद् व्यवस्थापनमा निरन्तर काम गर्दै आएको एक उदाहरणीय परोपकारी संस्था हो।
सन् १९९९ मा बेलायतमा श्रद्धेय रविन्द्र मिश्र र नेपालमा अरुणसिंह बस्नेतको सत्प्रयासबाट यसको सुरुवात भएको हो। आज यो अभियान संसारका विभिन्न देशमा रहेका नेपाली समुदायसम्म फैलिएको छ र नेपालमा आइपर्ने विपद् तथा आवश्यकताका समयमा तत्काल सहयोग पुर्याउँदै आएको छ।
भूकम्प होस् वा बाढी–पहिरो, शीतलहर होस् वा आगलागी—नेपालमा परेको हरेक विपत्तिमा पीडितका घाउमा मल्हम लगाउने मानवीय सेवाको अग्रपंक्तिमा हेल्प नेपाल नेटवर्क उभिँदै आएको छ।
संस्थाको काठमाडौं, चाबहिलमा कार्यालय रहेको छ। संस्थाको प्रशासनिक तथा कर्मचारी व्यवस्थापनका लागि छुट्टै स्रोत तथा कोषबाट आवश्यक खर्च व्यवस्थापन गर्ने व्यवस्था रहेको छ। यसका कारण संसारभरबाट प्राप्त सहयोग रकमलाई सम्भव भएसम्म जुन उद्देश्यका लागि सहयोग संकलन गरिएको हो, त्यही उद्देश्यमा प्रत्यक्ष रूपमा खर्च गर्ने परोपकारी संस्कार संस्थाले आत्मसात् गरेको छ। संस्थाको आर्थिक कारोबार तथा हिसाब–किताबलाई पारदर्शी राख्ने प्रयास यसको महत्वपूर्ण विशेषता हो।
संस्थाले दीर्घकालीन परोपकारी सेवाका लागि करिब १० करोड रुपैयाँको परोपकारी अक्षय कोष निर्माण गर्ने लक्ष्य लिएको छ। संसारभर रहेका नेपालीहरूको सहयोगबाट उक्त कोषमा करिब ६ करोड रुपैयाँ संकलन भइसकेको र यसलाई १० करोड रुपैयाँ पुर्याउने लक्ष्य राखिएको छ।
हेल्प नेपाल नेटवर्कको सेवा विशेषगरी नेपालका दुर्गम जिल्लासम्म पुगेको छ। डोटी, मुगु, दार्चुला, हुम्ला, जुम्ला र दैलेख लगायतका क्षेत्रमा स्वास्थ्य शिविर सञ्चालन तथा स्वास्थ्य सेवामा सहयोग पुर्याइएको छ। मुगुमा संस्थाको आफ्नै स्वास्थ्य चौकी समेत सञ्चालनमा रहेको छ। त्यस्तै, काभ्रेको धुलिखेलमा २१ जना बालिकाका लागि बालगृह सञ्चालन गरी संरक्षण, हेरचाह र अवसरबाट वञ्चित बालिकाहरूको जीवनमा आशा र सम्भावनाको उज्यालो थप्ने काम भइरहेको छ।
यस संस्थाको सबैभन्दा ठूलो शक्ति यसको विश्वव्यापी नेपाली समुदाय हो। संसारका विभिन्न कुनामा रहेका नेपालीहरूको सानो–सानो सहयोगलाई एउटै ठूलो मानवीय शक्तिमा रूपान्तरण गर्दै हेल्प नेपाल नेटवर्कले “नेपालीबाट नेपालीका लागि” भन्ने भावनालाई व्यवहारमा उतारिरहेको छ।
अन्ततः, हेल्प नेपाल नेटवर्क केवल एउटा परोपकारी संस्था मात्र होइन; यो विदेशमा रहेका नेपालीको मातृभूमिप्रतिको माया, सामाजिक उत्तरदायित्व र मानवीय करुणालाई सेवामा रूपान्तरण गर्ने विश्वव्यापी नेपाली अभियान हो।
फ्रन्टलाइननेपाल डट कम नेपालको समसामयिक समाचार, मनोरञ्जन, साहित्य र समाजका विविध आवाजहरू निष्पक्ष र पूर्वाग्रराहित रुपमा प्रस्तुत गर्ने डिजिटल संचार माध्यम हो । हामी सत्य, सन्तुलन र संवेदनासहितका कथाहरू पाठकमाझ ल्याउने प्रतिबद्धता व्यक्त गर्दछौं ।
