सम्झना उपाध्याय
अचेल ‘बा’ केही बोल्नु हुन्न
न आँखा तर्नु हुन्छ
न गुनासो गर्नु हुन्छ
म ढिला घर आउदा नि चिन्ता छैन
हप्तौं ओछ्यानमा हुँदा नि आश्चर्य भाव छैन ।
तँ के गरिराखेकी छेस् पनि भन्नु हुन्न,
यसो गर राम्रो हुन्छ पनि भन्नु हुन्न !
आमाको एक्लोपन बताउन खोज्छु
प्रतिक्रिया बिहिन बस्नु हुन्छ ।
सम्बन्धमा परेका चिराहरू सुनाउन खोज्छु
न जिज्ञासु, न सहजकर्ता बन्नुहुन्छ !
आफ्नो खबर पनि भन्नु हुन्न
हाम्रो हालचाल पनि सोध्नु हुन्न !
कहिलेकाहीं मन लागे सपनामा आउनुहुन्छ
शिरमा सुम्सुम्याउनुहुन्छ !
एकोहोरो हेरिरहनु मात्रै हुन्छ
अचेल ‘बा’ फ्रेममा बस्नुहुन्छ ।
प्रतिक्रिया
सम्बन्धित समाचार
