काठमाडौं । अन्नपूर्ण-१ हिमाल आरोहण गर्ने तयारीमा रहेकी अष्ट्रेलियाकी महिला पर्वतारोही एली पेपरले हालै लाङटाङ पदयात्रा गरेकी छिन् । पूर्व गाईड समेत रहेकी पेपर यही वसन्त ऋतुमा अन्नपूर्ण-१ हिमाल बिना अक्सिजन आरोहण गर्न नेपालमा छिन् । विश्वका आठ हजार मिटर अग्ला १४ वटा हिमालहरु बिना अक्सिजन आरोहण गर्ने उनको लक्ष्य रहेको छ ।
लक्ष्य अनसार पेपरले यही वसन्त ऋतुमा अन्नपूर्ण-१ को सफल आरोहण सँगै मकालु र कञ्चनजङ्घा हिमाल आरोहण गर्ने बताइन् । त्यसपछि पाकिस्तानमा रहेको नाङ्गा पर्वत र केटु हिमाल आरोहण गर्ने उनको योजना रहेको छ । त्यस्तै, शरद ऋतुमा उनले शिशापाङ्मा र चोयु हिमाल आरोहण गर्ने र बाँकी हिमालहरू गशेरब्रुम-२, गाशेरब्रम-१, धौलागिरी, ल्होत्से र सगरमाथा समेत आरोहण गर्ने उनको तालिका रहेको छ ।
समुद्र सतहबाट ८,०९१ मिटरको उचाइमा रहेको अन्नपूर्ण-१ विश्वको १० औँ अग्लो हिमाल हो । पेपरले आफ्नो गाइड मिङ्तेम्बा शेर्पा (मिकेल शेर्पा) सँग ४ दिनको लाङटाङ ट्रेक गरी फकेकी हुन् । पेपरले भनिन्, ‘मिङ्तेम्बा शेर्पा र म लाङटाङ भ्याली ट्रेकबाट भर्खरै फर्केका छौं । यो एक अद्भुत अनुभव थियो । मैले अन्नपूर्ण-१ हिमालको आरोहण तयारीमा लाङटाङ ट्रेक पदयात्रा गरेकी हुँ । हामी अर्को हप्ता अन्नपूर्ण आधार शिविरमा जानेछौँ । लाङटाङको पदयात्रामा हामी स्याब्रुबेशीबाट लामा होटल र क्यान्जिन गुम्पा गयौँ । क्यानजिन गुम्पाबाट हामी क्यान्जिनरी, त्सेर्गो रीसम्म हिड्यौं र याला खर्कबाट ५ हजार ८० मिटरसम्म पुग्यौं’ ।
उनले थपिन्, ‘लाङटाङ पदयात्राको क्रममा मैले वरपरका हिमाल, लङ्गुर, धेरै राम्रा चराचुरुङ्गी, सुन्दर गाउँ, लज र त्यहाँका मान्छेहरु एक्दम दयालु रहेछन् ।’
पेपर र उनको टोली फागुन २१ गते काठमाडौं आइपुगेका हुन् । उनले एक्सपेडिशन कम्पनी सेभेन समिट ट्रेक्समार्फत आरोहण गर्न लागेकी हुन् । पेपरले विश्वका आठ हजार मिटर अग्ला १४ वटा हिमालहरु मध्ये दुई वटा हिमालको अक्सिजन बिना सफल आरोहण गरी सकेकी छन् । सन् २०२३ को जुलाई १५ तारिखका दिन विश्वको १२औँ अग्लो हिमाल ब्रोडपिक (८,०५२ मिटर) र विश्वको पाँचौं अग्लो हिमाल मनास्लु (८,१६३ मिटर) को सन् २०२३ को सेप्टेम्बर २८ तारिखका बिना अक्सिजन सफल आरोहण गरी सकेकी उनले जानकारी दिइन् ।
सिड्नीकी पर्वतारोही पेपरले सन् २०२३ को जुलाई १५ तारिखका दिन विश्वको १२ औँ अग्लो हिमाल ब्रोडपिक (८,०५२ मिटर) को बिना अक्सिजन सफल आरोहण गरी पहिलो अष्ट्रेलियाली महिला बनेकी थिइन् । ४८ वर्षीया पेपरले विश्वका आठ हजार मिटरभन्दा अग्ला सबै १४ हिमालहरु आरोहण गर्न २००७ मा नेपालको माउन्ट चोयुबाट बिना अक्सिजन हिमाल आरोहण गर्न थालेकी हुन् ।
हालसम्म छ जनाले मात्र अक्सिजन बिना विश्वका आठ हजार मिटरभन्दा अग्ला सबै १४ हिमालहरु आरोहण गरेका छन् । त्यसमा पनि विश्वका आठ हजार मिटरभन्दा अग्ला सबै १४ हिमालहरुको मुख्य चुचुरोमा पुगेका भने दुई जना मात्र हुन्, उनीहरुलाई त्यसको लागि १६ वर्ष लागेको थियो ।
विश्वका आठ हजार मिटरभन्दा अग्ला सबै १४ हिमालहरु सगरमाथा, केटु, कञ्चनजङ्घा, ल्होत्से, मकालु, चोयु, धौलागिरी, मनास्लु, नाङ्गा पर्वत, अन्नपूणर्-१, गाशरब्रम-१, ब्रोडपिक, गाशरब्रम-२, शिशापाङ्मा हुन् ।
