एजेन्सी । बार्सिलोनाका किशोर खेलाडी आन्सु फातीले स्पेनिस नागरिकता पाउने पक्का भएको छ । यसको अर्थ उनले स्पेनको राष्ट्रिय टिमबाट खेल्न सक्ने मार्ग खुलेको छ ।
१६ वर्षका फाती उनी जन्मिएको गिनी–बिसाउबाट पनि खेल्न पाउँछन् । यस्तै आफ्ना हजुरबुवा–हजुरआमाको देश भएका कारण पोर्चुगलबाट पनि उनी खेल्न पाउने सम्भावना छ ।
फातीले स्पेनिस नागरिकताका लागि दिएको निवेदन देशको आन्तरिक मामिला मन्त्रालयले अघि बढाएको हो । स्पेनको नागरिक बन्नका लागि कम्तिमा १० वर्ष त्यहाँ बसेको हुनु पर्छ र फाती पछिल्लो १० वर्षभन्दा बढी समयदेखि स्पेनमा छन् ।
फातीले स्पेनको १७ वर्षमुनिको टिमबाट खेले पनि उनले सिनियर खेलमा आफ्नो अन्तर्राष्ट्रिय टिम छनौट गर्न पाउने छन्, गिनी बिसाउ, पोर्चुगल या स्पेन बिचमा ।
गएको शनिबार उनी सबै भन्दा कम उमेर च्याम्पियन्स लिग खेल्ने बार्सिलोनाको खेलाडी बनेका थिए । उनले ला लिगाका तीन खेलमा दुई गोल गरिसकेका छन् ।
