ताइवानमा दुई सय दिनदेखि कोरोना संक्रमण शून्य, सन् २०२०मा पनि आर्थिक वृद्धिदर राम्रो हुने


  • फ्रन्टलाइन नेपाल
  • शनिबार, कार्तिक १५, २०७७

  • ताइपेइ। ताइवानमा पछिल्लो २०० दिनदेखि कोरोना भाइरस आन्तरिक रूपमा सरेर संक्रमित भएकाहरुको संख्या शून्य रहेको छ। विश्वभरी कोरोना भाइरसको महामारी फैलिइरहेको भएपनि ताइवानमा भने अहिलेसम्म ५५० जना मात्रै संक्रमित भेटिएका थिए।

    त्यसैगरी कोरोना भाइरसका कारण ताइवानमा अहिलेसम्म सात जनाको मात्रै मृत्यु भएको छ। ताइवानमा झण्डै दुइ करोड ३० लाख जनसंख्या छ। ताइवानमा सबैभन्दा पछिल्लो संक्रमित गत अप्रिलको १२ तारिखका दिन भेटिएको अधिकारीहरुले जानकारी दिएका छन्। कोरोना भाइरसको महामारी नियन्त्रणका लागि सफल देशको रूपमा ताइवानलाई लिन थालिएको छ।

    चिकित्सा सम्बन्धी अष्ट्रेलियाली राष्ट्रिय विश्वविद्यालय मेडिकल सेन्टरका प्राध्यापक पिटर कोलिग्ननले कोरोना महामारीको राम्रो व्यवस्थापन गर्नेमा ताइवान विश्वमै सबैभन्दा अगाडि रहेको दाबी गरे। प्रतिवेदनहरुका अनुसार ताइवान सन् २०२० मा लगातार आर्थिक वृद्धि गर्ने थोरै देशहरुको सूचीमा पनि रहेको छ।

    महामारीको चर्चा थाहा पाउनासाथ आवतजावत गर्ने र भिडभाड गर्नेहरुलाई रोक्ने गरी प्रतिबन्धात्मक व्यवस्थाहरु लागु गरिएकाले संक्रमण फैलिन नपाएको उनको भनाई छ। यस्तो व्यवस्था जनवरीमै लागु गरिएको थियो। साथै ताइवानले शुरुदेखि नै सीमा नाकामा पनि कडाइ गरेको थियो।

    ताइवानमा विद्युतीय माध्यमबाट शंकास्पद व्यक्तिहरुको ट्रयाकिङ गरिएको र शंका लागेका व्यक्तिहरुलाई कम्तीमा १४ दिन क्वारेन्टाइनमा बस्नुपर्ने व्यवस्था कडाइका साथ लागु गरिएको छ।

    रासस

     

    प्रतिक्रिया
    सम्बन्धित समाचार